做過醫管局高層嘅香港防癌會主席高永文近年致力防治癌症工作，又經常去內地幫助災區病人，不過，高醫生掛住醫人，忽略咗自己嘅身體，佢幾年前曾經發現腦下垂腫瘤，三年前有個腫瘤科老友催促佢檢查吓大腸，赫然發現佢嘅大腸竟然生咗兩粒扁平息肉，好彩發現得早，拿拿聲拆彈先冇事。高醫生咁樣算唔算能醫不自醫呢？
高醫生尋日出席香港婦聯搞嘅「婦女健康大行動」，宣揚及早檢查子宮頸及大腸嘅重要性，佢成日呼籲五十歲以上人士定期檢查大腸，但三年前佢踏入五十歲時，忙得滯唔得閒驗，結果畀個腫瘤科醫生老友催促佢快啲檢查。高醫生檢驗後，先知道大腸生咗兩粒扁平息肉，呢種腸內息肉好易快高長大，仲會惡化成腸癌，及早發覺就只係小手術一個。
所以話，呢次經驗令高醫生更加警惕，仲叫大家咪學佢咁大安旨意，要定期驗身。佢仲分享飲食心得，話做人千祈咪揀飲擇食，肥膩嘢照食可也，最緊要均衡。