04/07/2010

播放本新聞相關短片

政情:白鴿黨畀人鬧 卿姐心噏

七一遊行結束,白鴿黨畀人由頭鬧到尾傳遍千里,該黨副主席劉慧卿尋日出席個電台節目時,坦言雖然預咗當日會畀人挑戰,但都難免心噏。卿姐話,二十一年前嘅六四,百多萬人大遊行,同埋○三年嘅七、八十萬人遊行,人數多過依家好多,但香港人都好理性咁爭取:「當年連個玻璃樽都冇打爛過,點解家吓幾萬人就變成咁﹖」

卿姐忍唔住有啲動氣咁反問:「我哋做咗啲乜嘢事呀﹖」佢話,當日鬧佢哋嘅人用嘅言辭好惡毒,比起鬧共產黨同曾蔭權集團更厲害,如果話大家都係為咗爭取民主,應該係和平、理性、有禮貌嘅,而唔係呢種謾罵嘅方式。

佢仲話,呢啲遊行畫面唔單止喺香港播出,全世界亦睇得到,即係話,全世界都睇得到香港人自己打自己,而且用嘅手法好差。佢講講吓,語調逐漸激動,似乎連日嚟受嘅氣令佢好唔舒服,不吐不快。