世界盃賽事精彩萬分，前晚八強賽事巴西對荷蘭，香港青年聯會一大班兄弟姐妹浩浩蕩蕩去銅鑼灣CEO Neway睇波，當晚青聯新舊會董一齊碰頭，主席陳仲尼（Rock）本來係捧巴西嘅，但因為身邊朋友大部分都支持巴西，為咗鋤強扶弱，所以支持荷蘭，最後巴西以一比二輸畀「橙軍」，佢真係夠眼光。
除咗阿Rock之外，同場仲有香港青聯前主席許華傑、副主席朱鼎健同鄭重科，仲有常務會董彭芷君兩公婆。許華傑話，兩隊都踢得精彩，一班兄弟姐妹都睇得好高興，今次聚埋都係想開開心心，算係達標喇。鄭重科就慘啲，因為佢牙骹戰輸咗要送出半支威士忌，不過佢強調唔使佢一個飲晒。
