本港有好多客家人，亦有唔少客家商會，成立近百年、會員人數高達一千嘅香港嘉應商會就係其中一個，該會現任會長曾智明（Ricky）係前全國人大常委曾憲梓嘅仔，佢每個月都會同商會班元老級核心成員喺中環租庇利街大本營食飯聚會，聆聽班世叔伯對會務嘅意見，呢個每月飯局仲有好多客家菜。
講起客家人嘅飲食文化，Ricky用「肥、鹹、熱」三字形容晒，佢話以前客家人住喺山區凍冰冰，飲食以熱盤為主，Ricky當晚安排嘅特色客家菜包括鯇魚丸湯、豬肚尖炒青豆、酒糟糕、鹽水雞、炆海參、蘿蔔絲丸、梅菜扣肉、釀豆腐等等。
炆海參煮法係先將海參（豬婆參）浸水七日，等海參吐出所有沙後，就加入上湯炆熟。客家人鍾意食海參，係緣於當年好多客家人飄洋過海到南洋同印尼一帶搵食，見到海灘有海參，於是煮嚟食，點知食過翻尋味，之後就將海參列入客家菜之列。
商會老前輩話，豬婆參喺二十年前只約一百元一斤，但依家已炒到六至七百元斤，成為貴價菜。仲有一味好地道嘅酒糟糕，特色係用酒糟加上番薯粉再燒成薄餅，甜甜哋又鹹鹹哋，仲有陣陣米酒香味，現時市面已經好難食到。