本文重點
七月啱啱開始，立法會都未休會，官場已經充滿抖暑氣氛，康樂及文化事務署署長馮程淑儀（Betty）、政制及內地事務局局長林瑞麟同民政事務局局長曾德成更急不及待搶閘放暑假添。Betty由聽日開始放一個月悠長假期，懶理滿枱嘅頭痕工作。至於啱啱打完政改大仗嘅林公公就喺立法會表決之後放咗近一個禮拜假，有份周圍嗌起錨嘅德成局長亦攞咗兩個禮拜假歎世界，佢哋個個走得快好世界，副手就慘囉。
冧樹浸死人 馮程照放假
因為頂唔住新聞處工時太長，有「官場靚太」之稱嘅馮程淑儀舊年八月調咗去應酬時間少啲、又唔使二十四小時候命嘅康文署，當時佢都放咗個悠長假期，唔夠一年，佢又由聽日放假到八月三號，幾乎抖足一個月，佢嘅工作就由康文署高級助理市政署長鍾嶺海署任。
康文署發言人話，Betty今次係私人放假，假期亦係一早計劃好嘅。不過康文署近排麻煩多籮籮，佢啲手尾無可避免要揼低畀下手，事關康文署轄下公園水池啱啱先發生阿婆溺斃嘅意外，點樣善後同防範都好重要，夏日炎炎，高溫一再刷新紀錄，點樣保障鍾意坐水池邊消暑嘅長者安全，真係要拿拿聲出招至得。
嚟緊月中，樹木辦就會公布二千棵危險樹木所在，康文署公園管轄嘅樹木咁多，上次沙田冧樹又關佢哋事，睇怕今次有好多高危樹木關佢哋事。
至於啱啱放完近一個禮拜假嘅林公公，今日下晝就會同多個政策局官員飛上北京，聽日同國家發展和改革委員會官員開會，商討香港點樣配合國家「十二五」規劃嘅工作，開完會之後，林公公又會抖番兩日。德成局長就由七號放到十八號，佢哋離岸期間，兩個副局長黃靜文、許曉暉又要頂上，呢個暑假真係有人快樂有人愁。