好多人都用「膽小如鼠」嚟形容怕事之人，其實，香港嘅老鼠橫行無忌，簡真係天不怕、地不怕，唔係膽小如鼠，而係膽大如鼠。呢，淨係今年五月以來，最少已發生四單老鼠咬人事件，而且一次比一次恐怖。

五月底，一位英國女遊客喺中環畢打街畀一隻十吋長巨鼠咬傷腳跟；上月六日，天水圍一個商場嘅燕窩店有隻六吋長老鼠從天而降，咬傷清潔工人；上月底，藍田商場有隻八吋長老鼠撲出嚟，咬傷一名穿涼鞋嘅女士。仲有吖，前日啫嘛，沙田新城市廣場一間食肆又有老鼠從天而降，跌落顧客手上。唉，試問港九新界仲有邊度未被老鼠攻陷？有老鼠出沒本來唔出奇，奇就奇在一個號稱國際大都會嘅地方，居然變成老鼠樂園，接二連三發生老鼠咬人事件，咁就實在太不可思議喇。

鼠患當前，有立法會議員提議休會辯論點樣滅鼠，但食物及衞生局局長周一嶽滋油淡定，佢話喎，今年嘅鼠患並唔係特別嚴重，相信係近期連場大雨，令老鼠紛紛走出地面。有個食環署官員仲搞笑，話老鼠係因為食咗滅鼠藥，變得迷迷糊糊，先至會攻擊人類喎，真係九唔搭八。

聽咗呢班高官嘅偉論後，大家都應該明白，點解老鼠目中無人啦。講到底，香港鼠患成災，多得呢班只識得卸膊嘅庸官。

食環署養咗一個幾百人嘅防治蟲鼠組，甚至曾登報聘請滅鼠專家，要求有大學文憑，中英文俱佳，仲要有動物學等專業知識添。呢啲所謂專家入職已經有三萬幾月薪，最高甚至可達七萬元，可惜原來係銀樣鑞槍頭，睇得唔打得。事實證明，食環署花費大量公帑聘請滅鼠專家，老鼠唔單止冇少到，反而多咗。

有次食環署大鑼大鼓，勞師動眾喺油尖旺捉老鼠，點知搞咗九日，先至捉到兩隻咁大把，畀人笑到面黃。呢，睇吓廣州滅鼠大王李鏡就點樣捉老鼠喇，人哋牛刀小試，一粒鐘就捉咗十七隻大老鼠。唔怕唔識貨，只怕貨比貨，唔怪得有立法會議員建議再邀請廣州鼠王嚟香港滅鼠啦。

話時話，鼠患唔講得笑o架，老鼠唔單止會咬人，仲會傳播細菌病毒，嚇走外國遊客仲係其次，如果引發瘟疫就死得人多咯。

叮佢個鎯鎯，周一嶽唔好再怨天尤人嘞，自己無能就要認，快快趣趣請廣州鼠王幫手啦，如果唔係，老鼠分分鐘連你都咬埋吖！