近期發生多宗老鼠咬傷人事件，搞到人心惶惶，喺旺角捉咗十七隻老鼠成功上位嘅「鼠王芬」梁美芬都要再次出動，今次佢嘅絕招就係《滅鼠天書》，同鬧爆食物及衞生局局長周一鑊同食環署署長卓永興辦事不力。
鼠患不絕，早前鼠王芬自掏腰包，攞咗七千蚊出嚟，印製四千本《滅鼠天書》，尋日仲走去「重災區」派，希望可以幫到居民咁話。打開本書望一望，咦，點解用簡體字寫嘅？唔通趕住出街，所以連改版都唔夠時間？鼠王芬解釋，內容其實都係廣州專家嘅經驗同心得，所以都係以簡體字寫成。再揭多幾頁，裏面仲有圖解教大家整陷阱捉老鼠，而且仲非常詳細，每個步驟都有圖交代。
鼠王芬一邊落力滅鼠，一邊就趁機批評周一鑊同卓永興，佢話，鼠患已成為本港嘅公共衞生問題，兩個負責公共衞生嘅官員真係責無旁貸。