世界盃賽事踢咗五十幾場，四分一賽果都係打和收場，好多賭波嘅人都輸到眼甘甘，不過，自誇「賭仙」嘅立法會議員詹培忠（金勞詹）就贏到笑，原來佢自創一套「和波必勝術」，場場都買和波，結果五十幾場波總共贏咗四百零八注，如果每注買一萬元，佢最少淨袋四百零八萬元，注碼再大啲，真係唔識笑囉。
金勞詹尋日離開立法會時，被問到有冇投注玩吓？佢隨即喺西裝褸袋取出幾張A4波纜紙出嚟，啲紙寫滿晒每場賽事資料及賽果，最後一欄寫上「+408」，即係贏四百零八注。金勞詹話，佢場場買和波，如果輸咗，下一場就買雙倍；再輸，就再買雙倍，應該等到和波機會。
睇番佢張波纜，有幾場和波賽事令佢起死回生，包括意大利對巴拉圭、斯洛文尼亞對美國、尼日利亞對南韓、巴拉圭對新西蘭、巴拉圭對日本，呢幾場賽事贏得嘅注數抵銷咗四十多場非和波賽事。金勞詹估計，餘下幾場賽事仲有和波機會（唔計加時），即係仲有機會進帳。