浸會大學新任校長陳新滋履新，二百幾個師生尋日為佢搞咗個歡迎會，陳校長都扮靚靚見學生，仲送上一份特別嘅見面禮，原來佢拍咗個幾分鐘嘅短片放上YouTube，呢段片長約幾分鐘，內容係佢介紹自己，為咗畀各種背景嘅師生聽得明，佢分別講咗廣東話、普通話同英文，今時今日大學校長都唔易做。
陳校長未上任先拍定AV，呢一招夠晒創意，又能夠同啲學生拉近距離，畀人知道佢善用現代資訊工具。發揮創意之後，陳校長都出盡渾身解數同師生玩對聯遊戲，佢先講橫批同上聯，前者係「篤信力行」，上聯係「立德言功以仁愛開百代」。下聯係乜？就係「求真善美持正心立千秋」。
不過，尋日陳校長好識做，為咗與眾同樂，佢特別邀請在座師生集思廣益，大家齊齊諗吓下聯，對得好嘅人，可以同佢共進晚餐。最後結果係點唔重要，但陳校長已經借呢啲方式同師生拉近咗關係，冇架子得嚟又可以詩文怡情。