長實「樓神」趙國雄好多橋，不過，佢啲橋有時係周遊列國、四圍吸收營養嘅結果。好似最近佢哋集團旗下有個樓盤「嵐岸」嘅英文名叫Sausalito，有啲人可能摸不着頭腦，但係聽吓趙樓神解釋就明白晒啦。
趙樓神最近啱啱去完加州，因為當地有個朋友請佢去Sausalito度假，邊度？即係三藩市對岸一個小城，著名嘅金門大橋連接呢個小城，當地風光秀麗，好有歐洲風情。趙樓神話，佢之前都去過當地一次，已經被當地嘅優美風景吸引，或者係咁，旗下樓盤便用呢個作賣點囉。
講開呢個小城，香港人其實並唔陌生，當年黎明同張曼玉主演嘅電影《一見鍾情》都係喺Sausalito一帶取景㗎。遊完加州後，趙樓神本來有機會去南非欣賞世界盃冠軍戰，但係公司好忙，佢惟有隔洋為愛隊巴西打氣。