政府讚煲呔針「為獨居長者提供平安鐘服務，建樹良多」，尋日就有位自稱「協會針」嘅長者安居服務協會職員爆料，指煲呔針喺協會十四年，出席會議唔超過二十次，點算為獨居長者勞心勞力呀？更何況，創辦人仲有羅致光、聶揚聲、羅就及黃岳永等人，何止煲呔針一個人呢？

有富貴黨中人更指，今年該黨得一個常委李應生攞銅紫荊星章，但被該黨視為叛將嘅全國政協委員李大壯就獲銀紫荊星章，連脫離富貴黨另起爐灶成立經濟動力嘅梁君彥更獲頒金紫荊，有關安排係咪剃富貴黨眼眉呢？

至於一齊退休嘅前食物及衞生局常秘孔郭惠清、前發展局常秘麥齊光、前運輸及房屋局常秘陳鎮源，麥同陳獲頒金紫荊，孔郭惠清就只有銀紫荊。有人質疑陳明知梁展文曾參與紅灣半島補地價事宜，都建議批准梁展文加入新世界中國，孭咗鑊都可以攞金紫荊，可見煲呔曾封賞真係冇準則。