市民自動獻身想入黨

鐵頭仁話預咗遊行時有人鬧佢哋，當日最混亂都係上到政府總部，因為當時有唔少有心人喺度等，有人噓佢哋，更有人撞過嚟，推撞之間，白鴿黨有成員嘅對講機畀人整跌咗，鐵頭仁好自然彎身去執，點知後面嘅人群繼續推，幾乎將佢踩喺地下，見慣伏擊大場面嘅鐵頭仁事後都話：「好彩我腰骨夠硬，即刻挺起身，如果唔係，可能好似蘭桂坊人踩人咁畀人踩死。」

白鴿黨每年七一遊行後，行到政府總部都會停留一陣宣示立場，但今年就改變慣例，喺警方保護下拿拿聲撤退，同埋行上禮賓府後門嘅小路，避開沿下亞厘畢道撤退嘅人群，一隊人行咗一陣先發覺鐵頭仁唔見咗。

鐵頭仁係身陷重圍定係被人挾走呢？鐵頭仁就話，佢當時冇跟大隊撤退，而係沿下亞厘畢道返咗中環嘅辦事處。今次白鴿黨心口掛個勇字面向市民，雖然係捱咗鬧，不過都賺得好多支持，鐵頭仁尋日話，近日收到一啲市民主動聯絡佢哋，想做黨員，佢哋都會考慮擴大白鴿黨之友嘅計劃。

至於狙擊佢哋嘅社民連同立場較激嘅人，鐵頭仁就滿有自信咁話，喺嚟緊嘅日子，白鴿黨會繼續同泛民協商爭取民主嘅工作，睇嚟，白鴿黨已經喺新角色之下搵到將來嘅路，唔再一味被踩、被狙擊。