超激人氣機動遊戲演變成「人肉保齡球」死亡遊戲，華僑城大俠谷探險樂園飛船模擬器發生嘅事故，諗落真係打晒冷震。事發之後樂園暫停營業，廣東省當局即時向各地旅遊部門發出通知，要求消除旅遊安全隱患，仲派高官去深圳善後，人命關天，認真唔係講玩。

呢單慘劇嘅遇難者全部係內地人，並無香港人，港府睇怕暗中大嗌好彩。講真，冇港人傷亡係不幸中嘅萬幸，慘劇雖然發生喺一河之隔嘅深圳，但港府唔好咁老定，其實本港近年亦曾多次發生旅遊設施意外，雖然冇搞出人命，但唔等於冇安全隱患，如果唔堵塞漏洞盡快消除隱患，遲早爆大鑊。

講到本港出名嘅旅遊設施，歷史稍長嘅有海洋公園，潮啲嘅有迪士尼樂園，最新嘅梗係昂坪360纜車啦。不過，呢個「三碌拎」景點開幕以嚟都唔知係咪腳頭唔好，事故一單接住一單，直頭好似食生菜咁。

叮！最誇張嘅係，昂坪纜車○七年曾發生轟動一時嘅「六月飛廂」事件，成個車廂跌落嚟，好彩冇人命傷亡，唔係分分鐘大劑過深圳呢鑊。舊年年底喺救援演練期間，又再發生纜車撞塔嘅事故，纜車公司事發後兩日至通知機電工程署，涉嫌違反有關操作保養規例。至弊佢哋同機電署就事故通報機制嘅規定「各自表述」，連責任誰屬都未清楚，試問出咗人命邊個孭？

唔止大型旅遊設施危機四伏，就算係一啲臨時性機動遊戲設施，亦因為港府監管失職，頻頻發生意外。

嗱，好似多年來曾分別喺金鐘添馬艦廣場等地點舉辦嘅香港環球嘉年華咁，○二年有兩名遊客玩「空中鞦韆」，腳部撞向附近圍欄嘅射燈受傷；○三年聖誕夜，一名女遊客被轉動嘅「音樂速遞」拋出，肩膊擦傷，負責操作嘅工作人員承認因疏忽而導致意外；○七年四月，「人造激流河」機動遊戲因為招牌被強風吹冧，壓落一艘經過路軌嘅「小艇」，造成三名遊客受傷。

計太一叮話齋，本港涉及旅遊設施同機動遊戲機嘅事故不斷，同深圳相比不過係五十步笑一百步啫。所幸未造成人命傷亡，但唔會永遠都咁好彩，如果唔趁未亡羊補定牢，將安全隱患消滅於萌芽狀態，遲早會出事，唔通真係要搞到深圳呢次咁大鑊，港府至肯做嘢？