喺圓洲角塌樹慘劇發生後，問責高官口口聲聲話慘劇一宗都嫌多，但之後點呢？講就天下無敵，做就無能為力囉！前排連場大雨又再發生連串塌樹事件，其中一棵仲係雪廠街政府合署西座嘅細葉榕老樹，塌樹塌到大門口，顯示政府嘅樹木政策不濟。
尋日立法會大會，同時有七名議員提出有關塌樹嘅緊急口頭同書面質詢，樹木管理辦公室屬於發展局局長林鄭月娥嘅範疇，但佢咁啱唔喺香港，搵咗環境局局長邱騰華做替工。
提出緊急口頭質詢嘅葉劉淑儀，喺質詢後即刻去信內務委員會主席劉健儀，投訴對邱騰華嘅回應唔滿意，要求喺聽日嘅內會上跟進討論，仲要求內會同意喺下禮拜三嘅立法會大會加開休會辯論添！塌樹問題唔可以歎慢板，葉劉擺明係要狙擊林鄭，要佢親身出嚟解畫，咪使旨意側側膊。
老實講，葉劉狙擊林鄭早有前科，好似之前立法會審議「強拍」，即降低收購舊樓業權門檻時，葉劉就登過有關「羔羊論」嘅全版廣告狙擊林鄭，雙方曾經隔空罵戰，就因為呢一役仲谷紅咗葉劉，首次喺民調中躋身十大議員榜首。唔知葉劉呢次係咪食髓知味，以塌樹事件再狙擊林鄭嚟幫多自己一把呢？