除咗授勳名單之外，政府尋日亦公布委任新一批太平紳士嘅名單，喺八十七人當中，其中五十一人為非官守太平紳士。睇睇張名單，最熟悉嘅面孔有做過商務及經濟發展局前局長嘅中策集團主席馬時亨、金管局前總裁任志剛、理工大學校長唐偉章、城大校長郭位、律師會會長王桂壎、廠商會會長黃友嘉、鄉議局主席劉皇發嘅女婿余漢坤等。
政府對政界都好疏爽，又委任咗多名議員做太平紳士，包括立法會議員李慧琼、沙田區議員龐愛蘭同葛珮帆、南區區議會副主席朱慶虹、東區委任區議員彭韻僖、黃大仙委任區議員史立德、葵青委任區議員方平、荃灣委任區議員陶桂英等。咁多太平紳士幫手巡視監獄同羈留中心，就唔使擔心有人獲不公平對待或被剝削權利啦！