國際小母牛香港分會近年積極籌款助內地農民飼養牛羊脫貧，除前財爺梁錦松同太太伏明霞瞓身支持外，仲搵到前高官Stephen葉澍堃幫手籌款。Stephen早前搞咗場拍賣籌款晚會，結果一呼百應，六席買枱加拍賣共籌得三百萬元，呢個強力吸水機真厲害！
出席嘅善長有「快勞夾大王」杜振源、仁濟醫院前主席吳守基、時裝設計師鄧達智嘅阿叔鄧慶治、米蘭站主席姚君達、「乒壇一姐」張怡寧等，大部分人都有捐出拍賣品，Stephen仲請嚟靚仔藝人黃宗澤同「阿叻」陳百祥到場幫手拍賣搞氣氛。
多件拍賣品中，以冠軍科技集團主席簡文樂割愛捐出嘅「綠松石右旋法螺」法器最值錢，籌得一百萬元，不過佢當晚有事冇現身。而杜振源亦豪捐五支法國五大酒莊嘅1982年靚紅酒做善事，共籌得逾四十二萬元。