周澄尋晚同我哋證實，當時因為失戀同其他個人問題搞到好唔開心，一時鑽牛角尖，自暴自棄，放縱自己，於是走咗去新花都應徵，最後做咗兩、三個月，直至中大收咗佢為止。不過佢強調自己只負責陪客飲酒，唔係日日返工，期間都有啲不快經歷，但就冇任何肉體交易。用行內講法即係做「金魚」，得個睇字。

佢呢一段獨特嘅工作經驗，連佢媽媽、著名劇作家岸西在內嘅家人都唔知，所以近日單嘢曝光後，佢哋都好吃驚，令佢承受唔少壓力。佢強調事情已經過去咗好耐，自己會視作一種社會經驗同鍛煉，希望大家唔好用有色眼鏡睇佢同呢個行業喎。