01/07/2010

播放本新聞相關短片

政情:范太妙論特首起跑戰

政改之爭塵埃落定,新戰場將係二○一二年特首跑馬仔之爭。外界估計行政會議入面至少有三人覬覦呢個位,其中召集人CY梁振英成日倒戈插政府博攞分,鬧高官係「火星人」,形勢七國咁亂。全國人大常委范徐麗泰尋日同傳媒茶敍時就變身「評馬人」,同大家妙論一番,但佢不禁先慨嘆全世界政府都有接班問題,點解我哋會咁亂?

范太以講述德川幕府權力鬥爭嘅日劇《篤姬》劇情為例,指當權者要有胸襟,「人哋至會服你」;至於「想上位嘅人,亦要尊重政府,要互相尊重」,顯然點醒緊煲呔曾同CY。

范太喺○四年曾指民調支持度唔高嘅CY唔適合做特首,到咗今日佢話:「我有冇講過佢(CY)適合做特首吖?」佢強調做特首一定要得到中央同市民信任,又不點名告誡成日批評政府政策嘅CY,政治道德好緊要,唔可以市民鍾意聽乜就講乜,因為市民嘅眼睛係雪亮嘅。

咁CY使唔使辭去行會召集人職務?范太話,咁又未使住,距離特首選舉仲有一段時間,但佢身為選委會委員,「會一路睇你點做,又睇吓你嘅對手點做,然後揀一個信得過嘅。」

范太口中CY嘅對手,唔知係咪唐唐呢?佢話唐唐着數在熟悉政府運作,○五年煲呔曾可以主政,除咗當時民望高,就係了解政府運作,而唐唐蝕底之處,自然係政府孭鑊,佢要孭埋一份。

范太評CY連珠炮發,但評唐唐算係留力,咁啱范太「姊妹」梁愛詩前日現身唐唐家臣林大輝成立嘅「C18」開幕禮,唔知當中有冇玄機呢?