01/07/2010

播放本新聞相關短片

政情:煲呔曾白鴿眼大細超

係人都知煲呔曾鍾意益自己友,但親疏有別嘅程度有幾嚴重,真係冇人估得到。尋日八到煲呔曾喺政改通過後向各個投咗支持票嘅立法會議員發感謝信,點知各個政團收到嘅內容都有分別,手握多啲票嘅就內容豐富啲、言詞親密啲,甚至讚揚嘅說話都多幾句。我哋計過,最長同最短嗰封信差咗足足九行字,煲呔曾今次真係將「大細超」發揮到淋漓盡致!

其實政府一直都有個慣例,當立法會通過一個法案後,負責嘅官員會向支持法案嘅議員發信表示感謝,今次啲政黨幫煲呔曾咁大忙,佢當然隆重其事,仲當成係一封官式文件添!不過,煲呔曾喺政改前硬生生轉軚,又忽略同建制派溝通,大家都關注到底佢會唔會喺畀建制派嘅感謝信上落啲嘴頭,不過望真先發現,建制派唔同政團收嘅信內容都唔一樣。

建制派唔Buy假善意

手握九票嘅建制派大黨建仔封信當然最詳盡,煲呔曾仲獨獨大讚佢哋「充分展示愛國愛港、勇於承擔、求同存異的高尚情操」,簡直係大送飛吻,爭在未咀佢哋一啖。其他有三、四票嘅建制派政團,煲呔曾都喺信中形容佢哋係「親密戰友」,希望大家可以繼續並肩作戰,但同建仔一比,親密程度當然跌晒watt啦!而個別撐咗政府好耐、乖乖投票又冇詐政府型嘅建制派議員仲慘,封信當堂少幾行,真係功利到冇眼睇!

喺泛民方面,當然唔少得轉軚支持政改方案嘅白鴿黨啦,封信梗係絕對唔同。雖然煲呔曾唔敢用親暱稱呼叫佢哋,但都多謝班白鴿仔以社會整體利益為依歸,仲話要對佢哋「為民主真誠奉獻、作出承擔的高尚情操」表達由衷謝意喎!而其他泛民嘅信只係草草話多謝支持,希望可以繼續保持良性互動等嘅客套說話,睇完都覺得佢冇誠意。

煲呔曾搞咁多嘢,都係希望建制派有怪莫怪,泛民可以對佢改觀,等第日施政可一帆風順,不過佢出信都大細超,依家肯定弄巧反拙。有建制派議員講明,若煲呔曾再成日當佢哋「老奉」會撐政府,就算出多幾多封信氹佢哋都冇用。煲呔曾真係想同議員改善關係嘅話,改吓自己嘅性格好過釋出假善意啦!