話說阿伯尋日上晝九點前喺西環第二街公共浴室沖完涼，啱啱想着衫，啲燈忽然熄晒，成間浴室黑麻麻。佢拿拿臨着番褲出去睇吓，大鑊！鐵閘已經鎖咗，想走都走唔到！佢惟有大聲嗌救命，途人發現報警，差人到場後，想辦法搵到食環署嘅外判商，先至開門將阿伯救出。

話時話，呢單浴室驚魂好離譜啫。管理員點解唔睇清楚裏面有冇人就鎖門o架？兜多個圈巡下，阻得幾多時間呀？難怪差人都睇唔過眼，狂炳佢唔負責任，仲問佢「知唔知鎖住人好危險o架」。問得好！如果個阿伯有乜冬瓜豆腐，睇佢點交差。

唔講真係唔知，公共浴室原來問題多多。先講開放時間，上午七點至九點，下午四點先至開門，八點半就閂門。嚟沖涼嘅多數都係打工仔，放工返嚟，食完飯已經八點幾，邊有時間嚟沖涼呀？仲有，時間表貼喺唔顯眼嘅地方，啲字又鬼死咁細，容乜易睇漏眼呀。

叮！唔怪之得有人話，公共浴室都唔係為公眾服務嘅，嗰啲管理人員懶到出汁，愈少人沖涼愈好，一夠鐘就閂門走人，連兜一圈睇下仲有冇人咁簡單嘅事都唔肯做。

因乜事公共浴室嘅管理會立立亂呢？有立法會議員踢爆，自從取消市政局後，好多政府服務外判出去，但又缺乏監管，所以錯漏百出。事實上，食環署接管咗公共浴室、公廁、垃圾站之後，就轉手外判出去，然後就關人個關。更弊嘅係，外判時仲搞乜嘢價低者得，羊毛出在羊身上，承辦商為咗有利可圖，就拚命壓低外判工嘅薪酬。外判工一日做到黑先至得雞碎咁多，邊度有心機做嘢呀。呢，本報記者就曾踢爆，有食環署外判工喺上班時間返屋企瞓大覺。

承辦商唔單止慳人工，連必要嘅物資都慳埋。嗱，好多公廁都實行清潔劑配額供給，用完冇得補。外判清潔工為咗慳料，將藥水有咁稀溝咁稀，用晒之後，就索性用清水嚟「消毒」，搞到好多公廁變咗蚊蟲細菌孳生地，問你服未！

其實，承辦商偷工減料，食環署署長卓永興等高層唔會唔知，但係佢哋居然隻眼開隻眼閉。無他嘅，佢哋又唔使去公共浴室沖涼，話之你七國咁亂啦。

叮佢個鎯鎯，食環署乜嘢都話要外判，係咁嘅話，仲要班高薪厚祿嘅官員做乜？不如將食環署署長個位都外判埋啦。