香港鐘錶業總會主席、太子珠寶執行董事Joseph朱繼陶，日前出席職業訓練局周年酒會，見佢打咗條黃色領呔，上面滿布小巧可愛嘅動物，顏色輕柔顯眼，細問之下原來係意大利名牌Salvatore Ferragamo嘅傑作。Joseph笑謂，條呔係自己揀嘅，佢已幫襯好多年，依家係享有七折優惠嘅超級貴賓添！
Joseph話西裝、領呔都係自己買，除咗Ferragamo領呔外，見佢件恤衫都好特別，佢話由於近年身形膨脹，所以恤衫係搵尖沙咀一位上海師傅訂造。
當日佢特登去為職訓局旗下香港知專設計學院打氣，事關本港鐘錶業有唔少自創品牌，佢身為主席梗要撐本地創作啦！
