阿John陳祖澤尋日自爆話八月中旬以馬會主席身份去法國之後，就會喺八月底正式離任，結束四年嘅主席任期，由馬會副主席施文信（T Brian Stevenson）接棒。
有冇機會再做多一屆呀？阿John好瀟灑咁話：「唔會喇！」對於繼任人施文信，佢話一定會支持佢。計埋做董事、副主席，阿John話佢喺馬會已十幾年，自認為馬會出咗唔少力。點知佢話鋒一轉，話題轉去世界盃足球賽，話佢喺馬場鋪嘅草皮一定靚過南非啲足球場！原來佢嫌南非足球場嘅草皮一踢就爛，馬場嘅草皮就經得起萬馬奔騰嘅考驗。
後來見到施文信，梗要第一時間恭喜佢啦，佢好謙虛咁話好享受依家做副主席嘅日子，至於係咪「升呢」做主席，就等八月底董事會改選至算喎。施文信係特許會計師，仲係滙豐非執行董事同公務員敍用委員會成員，佢上任後會同馬會行政總裁應家柏並肩作戰。應家柏係德國人，馬會主席同CEO都係外籍人士，實屬近年少見。