政改方案通過後，負責選出特首嘅選委會勢成兵家必爭之地。依家選委會分為工商金融界、專業界、勞工社會服務及宗教界同政界等四大界別，各有二百席，旗下再設分組。按政改方案，下年十二月改選嘅選委會，四大界別各增一百席至三百席，除政界嘅席位分配比較清晰，其餘三大界別點樣分餅仔，方案冇交代。
工聯會黨團召集人KK黃國健搶先話，全港打工仔有三百萬人，工會達七百個之多，但《基本法》當年設計選委會時，重工商、輕勞工，工商界佔盡第一界別嘅二百個選委議席，而勞工界喺第三界別就要同漁農、宗教、社福同體育演藝文化及出版界均分，即只佔四十個位，席數同代表性唔成正比，要求趁政改契機修正，將新增一百個議席嘅一半撥歸勞工界，即擴大至九十席，僅次於區議會組別。咁講，KK即係明刀明槍為業界擴充地盤啦！
勞聯立法會議員李鳳英話，勞聯未傾過選委會安排，但作為業界代表，佢都贊成加多啲位畀勞工界咁話。
但白鴿黨嘅張文光就強烈反對，指親建制嘅工會依家壟斷晒勞工界選委會議席，再大幅加位即係擴大壟斷，令傳統工會可以左右特首選舉大局。佢仲話，既然KK話代表三百萬名打工仔，咁就不如將勞工界選委交由全港打工仔以一人一票產生啦。睇嚟選委會戰場未到本地立法階段，各黨派已經開炮嘞。