自喻處於「退休過度活躍期」嘅天文台前台長「黑英」林超英尋日繼續佢嘅「外賣」旅程，向一班打算參加台、韓、港三地環保交流團嘅初中生演講。唔好以為黑英淨係講氣象、講環保在行，原來佢對外語都有一手，喺班學生面前演繹「你好」、「多謝」嘅普通話同韓語版，左一句「晏囉哈些唷」（你好）、右一句「琴沙堪咪打」（多謝），相當順口！
面對環保交流團百幾位初中生，黑英有感而發，話香港後生仔諗嘢係好快、識好多嘢，但對比台灣嘅學生，就未學識點生活，暗示香港學生對環境保育唔太重視。
話晒係交流團，黑英即時提點幾招易明嘅，包括提醒學生要有禮貌，就算語言唔同，至少有幾句問候語傍身表示善意，之後仲教「你好」、「多謝」嘅韓語同普通話點講，差在未講埋台語。話時話，舊年退休嘅黑英，講過退休後都要不斷增值，唔知係咪因為咁，所以揀咗唔算易學嘅韓語嚟研究吓呢？