大會應該預見到可能會亂上加亂，今次又推出幾招新嘅防亂措施去保護嘉賓，主要針對台下嘅觀眾。首先，大會預咗二百二十張飛，觀眾入場要攞飛，派晒就唔畀入；第二，大會用鐵馬圍出一條逃生通道，保障嘉賓安然離場；第三，節目完結前，警方早早就用鐵馬同人牆隔開現場觀眾同嘉賓，嘉賓嘅車完全走晒後先開番條公眾通道，憤青雖然咬牙切齒，但又無可奈何；最後一招就最無聊，大會向所有入場觀眾派發一張規則，呼籲觀眾維護人身自由同保障對方尊嚴同安全。

卿姐黃碧雲先發制人

台上嘉賓都做足防亂措施，好似卿姐同普選聯副召集人黃碧雲就先發制人，不斷重提自己畀人用粗口問候，黃碧雲話公共空間已經畀一班非常「父權」嘅男性佔據，仲經常講出一啲侮辱女性嘅說話，仲重提網上有人話要強姦卿姐呢件事，即時令到全場噓聲四起，不滿佢哋轉移視線，迴避問題。雖則係咁，但兩位阿姐睬佢哋都傻，無論台下觀眾講乜，佢哋都會拉到去語言暴力呢方面，真係服咗佢哋。

唔知係因為黃雨吖，定係台上台下策略性防亂奏效，「80後」人數少咗致攻擊力大減，啲嘉賓可以喺冇威脅嘅情況下施施然離開，簡直係近期少見。順帶一提，論壇嘉賓仲有政制及內地事務局副局長黃靜文，但由始至終都冇人理佢，最後連佢走埋都冇人知。