當局話喎，主辦亞運會呢類大型國際體育盛事，可以為香港帶來莫大裨益。冇錯，亞運會係亞洲首屈一指嘅體育盛事，辦得好確實可以提升香港嘅國際形象，之但係俗語有云，冇咁大個頭唔好戴咁大頂帽，香港係咪真係有條件、有能力主辦好亞運呢？萬一到時又搞到烏龍百出，甩漏多多，咁就唔係裨益，而係出醜啦，叮！

呢，睇番舊年東亞運，雖然香港運動員嘅傑出表現令人眼前一亮，但主辦單位嘅蝦碌表現更加令人O晒嘴。宣傳嚴重不足、賣飛安排不善、射擊場館爛尾、室內場館滲水、火炬幾乎傳入電視台……仲有吖，主場館袖珍不特止，而且係問題多多嘅豆腐渣工程，條跑道未開賽已經凹凸不平，話要創造傳奇一刻，結果創出「笑話一刻」。你話喇，如果亞運會又係搞成咁，香港豈不是乜嘢架都丟晒！

再講吖，搞亞運唔單只要講硬件，更重要嘅係軟件，例如必須要有體育政策配合，必須對本地運動員提供支援，但係咁多年來，港府為運動員提供咗幾多支援？唉，講起就失禮死人，正如運動員話齋：「做運動員嘅收入仲少過做跟車。」講真，香港運動員真係好叻o架，幾乎完全靠自己都可以贏到咁多獎項，港府應該好好反省吓喇。一句講晒，香港運動員唔係垃圾，庸官先至係垃圾！

最現實嘅問題係，主辦亞運要使幾多錢呢？係人都知，搞亞運通常入不敷支，例如廣州亞運咁，預算投入超過二千億元人民幣，簡直係天文數字。今時今日，香港經濟低迷，貧窮人口超過一百萬人，港府與其好高騖遠，搞乜嘢亞運，不如將呢筆錢攞嚟發展經濟，幫助窮人脫貧，咁仲實際啦。

查實，香港人一向務實，開埠百幾年來，全憑香港人腳踏實地，一步一腳印，香港先至可以成為金融中心。可惜回歸後，港府好學唔學，學埋晒務虛嘅嘢，搞埋啲假大空嘅政績工程。叮！再咁落去，香港遲早變成吹水港！