城中名士都有一個心愛嘅會所，獲美國《福布斯》雜誌選為全球十大名人飯堂之一嘅中國會更加捧場者眾，呢個九一年成立嘅會所發起人有十幾個，包括中式服裝店上海灘嘅創辦人鄧永鏘、已故全國政協常委徐展堂，仲有全國政協委員李大壯（David）。會所出年就迎嚟二十歲生日，David話已經當咗會所係佢半頭家。
位於中環銀行街舊中銀大廈十三至十五樓嘅中國會，面積逾一萬平方呎，入會費十五萬元或以上，每月要繳交一千二百元會費。呢度布置富有老上海懷舊風情，據David話，中國會由鄧永鏘一手一腳設計，當年佢四出搜羅古董文物，好似天花嘅電風扇、廳房嘅亨達利牌座枱鐘、通用牌撥輪式電話同中式紅木枱櫈等。
會所最緊要係食物，David推介巧手鵝肝雲吞、香煎葱油餅同懷舊焗豬扒飯等，而斑片梅菜蒸豆腐、蘭州拉麵更係佢嘅至愛，每次落去開餐都會柯打一碗蘭州拉麵。中國會運作十九年，依家每呎營業額已成為全港之冠，David更將商務早餐同午餐都搬嚟呢度食，難怪佢話中國會已成為佢生活一部分。