特區問責班子過去半個月四圍去「起錨」，搞到班問責官員個個聲嘶力竭兼「起錨」上腦。日前政改方案獲立法會通過，但啲問責官員反而唔多適應，保安局局長政治助理盧奕基尋日出席一個場合時，仍然喺外衣上掛住個「起錨」襟章，佢隻錨到依家都仲放唔低，難怪畀人笑啦。
尋日女童軍有個活動，盧奕基同唐尤淑圻都獲邀擔任主禮嘉賓，唐媽媽一襲童軍制服，盧奕基就一身西裝執到正，心口仲掛住個「起錨」襟章，唐媽媽一見佢就忍唔住笑，仲指住個襟章，話唔係已經起咗錨咩，點解仲戴住個「起錨」襟章嘅？
盧奕基一聽，面上有啲唔自然嘅表情，但佢即時執生，話「起錨」未完㗎，政府會繼續「起錨」向前行。事後我哋都問佢點解仲戴住個襟章，係唔係上頭有指示？盧奕基話唔關事，只係佢係問責班子一分子，戴住襟章以示團結啫。
不過，環境局局長邱騰華尋日出席個活動時就冇戴嘞，但畀個科大學生捉住投訴港府環保政策唔掂，又批政府建築物勁嘥電，呢位學生仲將自己搜集到嘅證據畀邱騰華睇，搞到佢即時面黑黑。