政改卒之起錨，但煲呔曾同建制派嘅心結就愈結愈深。前日係建制派定期舉行飯局嘅日子，表決完畢，建制派照計應該碰吓杯o架，過去呢類飯局多數有成三十名議員出席，夠晒墟冚，但當晚只得一半多啲，其中建仔佔咗六個人。據講，今次請食飯嘅係煲呔曾親信、立法會金融界代表李國寶，建制派咁多人冇影，係因為政改頂住道氣要向煲呔曾抗議吖，定係唔畀面擺局嘅李國寶呢？
建制陣營中，富貴黨完全冇人出席，黨主席劉健儀話，前晚有個一定要去嘅酒會，撞期都冇辦法。佢哋幾日前先因政改辯論畀政制及內地事務局局長林公公以「檸檬茶論」寸爆，轉過頭就全體缺席煲呔曾親信嘅飯局，真係咁啱得咁蹺。IT界代表譚偉豪就話佢一早約咗人。日前喺立法會狂數政府「有事鍾無艷，無事夏迎春」嘅匯賢智庫葉劉淑儀則因飛上海上堂而缺席。
比較精明嘅朋友就會發現，平時嘅建制派飯局，都係由建制派嘅中堅分子請客，建仔、經濟動力同詹培忠都有份，今次就破天荒由平時喺立法會「三點不露」嘅李國寶付鈔，箇中原因真係各有高見。