我哋日前報咗立法會議員「IQ博士」黃宜弘娶新抱嘅喜事，尋日主人家喺尖沙咀洲際酒店舉行酒會同筵開六十席，IQ博士做醫生嘅三仔群恩迎娶音樂博士吳啟華，由於女家係台灣人，IQ博士尋日喜孜孜咁話，今次婚禮表現出香港同台灣一家親。
到訪賓客有唔少重量級政商界名人，包括搵梁鳳儀寫自傳嘅恒地主席李兆基、長實集團副主席李澤鉅、英皇集團主席楊受成、牛仔褲大王楊釗夫婦、玩具大王蔡志明夫婦等都有到賀，中策集團主席馬時亨同行政總裁柯清輝夫婦、福建幫頭領楊孫西及盧文端亦先後送上祝福。
酒會喺傍晚六點開始，之前IQ博士夫婦同一對新人及親家共二十幾人，齊集酒店樓梯影大合照，兩家嘅男士清一色着西式禮服同打煲呔，女士就着中式裙褂，不過，新娘就着傳統紅色裙褂，同其他女士嘅金黃色裙褂分開，新郎亦棄煲呔改打領呔。黃、吳兩家人合照後，IQ博士頻頻走上走落迎接貴賓，仲話七十一歲人，咪當做運動囉！