平板電腦一出就成為潮人必備品，香港青年聯會新任副秘書長、許晉亨外甥郭永亮（Andy）同全國青聯副主席曾智雄不約而同隨身帶住部潮物iPad。Andy用iPad嘅相片功能，同大家一齊睇佢兩個月大嘅囝囝，成個慈父樣；智雄就同大家重溫佢同太太喺新疆影嘅結婚相，其中一幅「新娘上樹」更令人大開眼界。
Andy係Apple產品嘅忠實擁躉，一個月前用六千蚊買咗部iPad，愈用愈讚。佢透露，囝囝名叫郭晉熹，英文名叫Archie，改呢個名係因為囝囝出世後第一個動作就打噴嚏，所以佢哋改個差唔多音嘅名。
至於曾智雄部iPad就配咗個潮人牛仔褲品牌ed hardy製造嘅iPad機套保護。佢都讚iPad好用，仲展示同太太喺新疆影嘅結婚相，其中兩張相好特別，一張喺河邊取景，另一張就見到新娘子瞓喺樹上，智雄就喺樹下凝望太太，甜蜜到極。不過，新娘上樹難度都幾高，智雄就爆料話：「咪係我抱佢上樹囉！」