本文重點
政改方案通過之後，政界嘅焦點迅即轉移，白鴿黨就忙於自救，避免今次撐方案嘅大火燒到埋身，到時白鴿變咗「燒乳鴿」。主席鐵頭仁尋日喺電台節目中大打感性牌，話日前喺立法會門外畀人圍，甚至被仇視，令佢心情幾沉重。其實白鴿黨內部都諗定幾招洗底，昔日黨友更寄語白鴿黨要同政府劃清界線，乜嘢授勳、上京甚至回鄉證都唔好制，煲呔曾say yes嘅，白鴿就頂到行。總之鐵頭仁嚟緊會發揮鐵頭功，用上屆世界盃法國名將施丹頭槌襲對手嗰招，吓吓頂開煲呔曾就有運行嘞！
鐵頭仁尋日喺個電台節目中以寫信形式談及區議會方案浮出枱面嘅經過，佢承認白鴿黨嘅決定令佢哋面對震盪，黨內更有分歧同陣痛，但係政改嘅僵局解開咗，佢反問爭取民主嘅路係咪只有一條？其他路徑就係歪路、死路？已經退咗黨嘅鄭家富就喺另一個電台節目中，警告白鴿黨必須盡快同政府及北京分割，港府要授勳、上京訪問甚至要求內地發回鄉證等都要小心克制，避免因小失大。
畀人扑多鑊可救全黨
講嚟講去，白鴿黨都要盡快修補形象。據講，佢哋諗咗幾招，為免激進派再抓住佢哋嘅把柄，白鴿黨都要「玩激啲」，為「被招安」嘅指摘洗底，嚟緊一段時間，佢哋會大力鞭撻政府，必要時更會同政府劃清界線。早排煲呔曾喺一啲公開場合點名讚白鴿黨有承擔、有勇氣，事後搞到白鴿黨畀人鬧多兩錢，所以白鴿黨都要開聲要求佢哋唔好再贈送「死亡之吻」。
有白鴿仔仲攞鐵頭仁嚟講笑，話最好鐵頭仁喺中環麥記畀人扑多鑊，而個行兇者就由中年彪形大漢改為追隨社民連嘅「80後」瘦削宅男，如果成事，一定係一個鐵頭救全黨嘅佳話，到時白鴿黨面對嘅難題都解決晒啦，只係唔知鐵頭仁仲捱唔捱得住啫。