立法會一連三日審議政改方案，好多議員同高官嘅社交活動都停晒。前晚韓國一間葡萄酒收藏商喺中環一間酒店舉行香港開業酒會，飲食界議員「肥仔張」張宇人梗要畀面出席，見佢晚上八點幾喺立法會溜咗出嚟，仲講定已經帶咗手機、Call機，隨時準備返去投票。
肥仔張呻話原本訂咗周三機票去法國，帶埋舊年香港「美食之最大賞」得獎廚師去參加波爾多葡萄酒節，教當地酒莊點樣用唔同靚酒配搭美食，然後再去巴黎、倫敦，行程不知幾寫意。點知突然間立法會又要展開車輪式辯論，佢惟有留喺香港。不過佢爆肚話一向好識歎紅酒嘅政務司司長唐唐安慰佢，話個葡萄酒節麻麻地喎！
講開歎紅酒，佢話自從減肥成功後，飲酒都好揀擇，冇專家畀九十分以上嘅酒都咪預佢，費事嘥晒佢食嘢嘅Quota。佢好精明咁計條數畀我哋聽，話半支紅酒高達七百五十卡路里，試過有次佢夜晚飲咗好多酒，第朝上磅竟重咗兩磅，都咪話唔驚。