起邊個底？咪就係身兼職工盟秘書長嘅李卓人囉！金勞詹大爆對方出身富有家庭，懷疑因為分唔到家產所以投身工運行列。話聲一落，其他議員都呆晒，有議員舉手向立法會主席投訴金勞詹違反議事規則。

主席裁定金勞詹犯規，要佢收番言論，但佢唔知做乜咁好火繼續抗議，佢「徒弟」謝偉俊亦加入戰團，話主席對建制派好嚴、對泛民就鬆手。主席惟有即時暫停會議，拉咗當事人入主席室密密斟，最後當然係金勞詹投降，返出來之後話係無心之失喎！

其實，金勞詹都唔係第一次喺立法會起人底，今年一月佢同社民連黃毓民係議事廳嗌交亦有爆料，今次又冇啦啦搞李卓人。佢事後解釋係冇惡意嘅，只係唔抵得對方成日踩功能組別，所以拉佢落水喎。當事人李卓人又點呀？事發時佢根本唔喺議事廳，返嚟後一臉茫然唔知乜事。