立法會議員「IQ博士」黃宜弘同太太梁鳳儀今日再做老爺、奶奶，事關三仔群恩迎娶拍拖多時嘅女友吳啟華，仲邀請多位高官名人去飲杯喜酒添！
尋日致電恭喜IQ博士娶新抱，佢表現得相當興奮，話自己心情好到不得了，尋晚仲出動太太送畀佢艘「Win Win雙贏」豪華遊艇，接載親家入南丫島食海鮮，大家飲得好高興，狂歡到九點先返屋企休息，準備今日嘅婚宴重頭戲。佢話婚禮完成後，聽日會同親家一齊飛到上海玩兩日，之後大家各自各精彩，群恩兩公婆就去度蜜月。
群恩依家喺美國做醫生，老婆啟華就喺亞利桑那州州立大學做音樂教授，所以一直喺美國居住。點解回港擺酒結婚呢？IQ博士解釋：「我哋啲朋友多數喺香港，唔通要我哋咁遠路飛過去美國飲喜酒咩，梗係叫佢哋返港擺酒啦！」