前晚開完會後，問大舊石遲啲會唔會約番女朋友Lisa補祝生日，佢死都唔肯講，神神秘秘話依家仲未知，要等表決埋政改方案先慢慢諗。佢仲猛咁呻，話因為生日要困喺立法會開會，結果搞到禮物都收唔到一份。咦！睇真啲，佢好似戴咗副新眼鏡喎，唔通係買畀自己嘅生日禮物？

大舊石笑住話副眼鏡確實係未用過，但其實已經買落一排，同生日冇關。既然收唔到禮物，佢又會唔會買份大禮獎勵吓自己咁呢？佢仲自嘲身形肥胖，日日都好似過生日咁，所以都唔需要特別買嘢喇。究竟身形健碩同生日有乜關係？睇怕只有佢自己先知。