單雞係足球發燒友，半年前已計劃一家四口去南非睇世界盃，當時雖然未知政改方案定喺「6．23」表決，但都估到大約喺七月左右。大家諗住佢唔係立法會議員，加上只負責黨務，於是冇要求佢留港作戰。點知過去兩個月形勢急劇變化，黨承受內外巨大壓力，時刻艱難，而佢就喺南非睇世界盃，引起唔少黨友微言。

一名不願具名嘅黨員話政改大戰峰迴路轉，令提出「一人兩票」區議會方案嘅白鴿黨成為政治漩渦中心，尤其去到表決前幾日，更加成為社民連嘅箭靶，內部又爆出鄭家富退黨，「少壯派」施壓，正所謂內外交困，但係單雞全程做隱形副主席，音訊全無，唔通睇世界盃仲緊要過黨嘅生死存亡？有黨員仲講笑話等單雞返嚟之後，黨高層應該對佢進行紀律聆訊，起碼要佢喺南非買晒啲世界盃紀念品返香港畀黨友賠罪。

罰單雞買紀念品，荷包大出血事小，但咪輕視呢個黨內小風波，佢隨時要付上政治代價。眾所周知，單雞係白鴿黨部署接替鐵頭仁做下任主席人選，依家搞出件咁嘅事，對佢嘅接任之路有冇影響都好難講㗎，又睇佢點撲熄黨友怒火？尋日搵過單雞，佢過咗幾小時後終於覆來短訊，透過我哋向黨友耍冧。段短訊（見圖）咁講：「我實在對不起弟兄姊妹。黨在最困難的時候，我不在港。」不過佢強調同兄弟「有短訊」溝通，言下之意打電話就免喇！