中央同特區政府為咗取得白鴿黨嘅支持，希望以高票通過政改方案，中央大開綠燈之餘，特區政府行政會議仲通過接納白鴿黨嘅「一人兩票」區議會改良方案，建制派看在眼裏，心裏好唔舒服，尤其係出嚟瞓身撐政府嘅建制派重量級人物，預期喺政改一役後，中央同特區政府都要想辦法去撲火，安撫吓呢班親密戰友。

其實喺立法會呢幾日審議政改方案期間，明眼人都睇得出建制派喺發言嘅時候心裏都有條刺。話說富貴黨主席劉健儀前晚發言時話，如果區議會改良方案係由富貴黨提出，政府好有可能會請佢哋食檸檬，因為佢哋一早答應支持舊方案。

唔安撫建制派 火上加油

大家都聽得出，呢位親密戰友講得幾酸溜溜，但知唔知林公公講乜？佢竟然仲寸寸貢，話劉健儀唔知點解成日都提到檸檬，如果繼續咁講，會令人誤會政府發咗牌畀政制及內地事務局開茶餐廳，專做港式奶茶同檸檬茶喎。

雖然係劉健儀點火先，但睇在佢撐政府在先，喺呢個時候本應去撲火嘅，只要林公公講少句或者講幾句冧人嘅說話咪冇事囉，但唔知佢係坐定粒六而忘形得滯，抑或打從心底覺得建制派只係橡皮圖章，仲倒轉頭走去火上加油，辣㷫劉健儀。

劉健儀事後反擊話聽到林公公咁講，真係有諗過舉手要求澄清，但事後覺得林公公都係開玩笑，最後打消咗個念頭。

咁都算劉健儀夠大量，唔同林公公計較，但其他人唔係咁講哩，就連剛剛退出白鴿黨嘅鄭家富都睇唔過眼，話林公公雖然大權在握，但都唔應該目中無人，要謙虛一啲，唔好以為數夠票就乜都唔使理。

嗱！呢啲咪叫做衰多口囉，林公公把口唔收，搞到無端端惹火上身，簡直係自己攞嚟衰。