教育局最新資料顯示，在職教師涉及性罪行個案淨係舊年已經有十一宗，比○八年大幅飆升五成七，過去四年半在職教師涉及性犯罪被定罪個案有十六宗。同樣令人關注嘅係，被起訴但罪名唔成立嘅個案有十一宗，而曾捲入性犯罪個案嘅教師入面，有四人仍然任教公營學校。

叮！為人師表，本身就應該以更高道德標準嚟要求，更何況施教對象係心智未成熟嘅細路，如果唔嚴加防範，心懷不軌嘅淫師好容易有機可乘。唔怕一萬最怕萬一，當局有責任將同學面對性犯罪風險減到最低。涉及在職教師嘅性醜聞愈爆愈多，如果唔堵塞漏洞，後果不堪設想。

教協批評話，數字反映現時防止有性罪行紀錄教師滲透校園嘅措施並唔足夠，促請當局開設在職教師涉及性罪行嘅名單，供學校參考。冇錯嘞，亡羊就要補牢，當局如果繼續畀淫師自出自入校園，甚至潛伏犯案，等同充當幫兇。

不過，政府卸膊話教師聘任屬於校本管理範疇，又建議學校制訂一套妥善嘅政策同程序，甄選合適應徵者。叮！鬼唔知阿媽係女人咩！教育界一直促請盡快設立性罪犯名冊，至弊當局冇晒下文，家陣校方連邊個曾經衰過都冇辦法查到，試問點甄選合適教師？又點防範校園風化案吖？

阻止校園性侵犯惡化關鍵係防範，保護兒童組織多年來不斷要求當局公開性罪犯資料，等學校同補習社可以翻查，避免請咗曾干犯性罪行嘅教師，但港府一直以人權及私隱為由置之不理。

當局鑑於輿論壓力，早排提出防止有性罪行紀錄教師繼續任教嘅新措施，不過所謂「新招」睇來睇去淨係得個「卸」字，無非係將甄別有性犯罪紀錄教師嘅責任推晒畀學校，以保障私隱做藉口，將保護兒童嘅責任推得一乾二淨。

前年本港有曾因非禮女童被判刑嘅男教師，坐完監居然獲聘另一中學，重執教鞭成個學年之後至被發現。校方無從知道佢以前做過乜，同學更加唔知自己日日同色狼共處一室。當局繼續要羊仔自己（目及）住色狼？簡直係搵笨夾靠害！

唉，道德淪喪，師道不存。鹹濕先生周圍都係，防不勝防，當局該做唔做，對色狼潛藏校園造成嘅隱患無動於衷，計太一叮話齋，如果萬世師表孔仲尼翻生，睇怕都要再講句「吾不欲觀之矣」。叮！