本文重點
問責班子尋日繼續落立法會為政改辯論撐場，冗長嘅辯論好煩人，商務及經濟發展局副局長蘇錦樑同教育局副局長陳維安尋日喺行政長官產生辦法通過之前，已經玩「落區」，由立法會公眾席行咗去遮打花園嘅支持政改陣營打氣，仲同一個團體嘅樂隊一齊打鼓夾band。不過，佢哋雖然玩得興奮，但同佢哋一齊玩嘅後生仔竟然唔係好識呢兩個官場新貴，副局政助做咗成年都係咁嘅成績，真係冇眼睇。
邊打鼓邊叫起錨
尋日晏晝十二點幾，蘇錦樑拉埋陳維安去撐政改嘅香港青年聯會攤位，當時有幾個年輕人即場奏樂唱歌，蘇錦樑同陳維安行過時，二話不說攞起樂隊成員嘅鼓棍，起勢咁打起鼓上嚟，仲邊打邊叫「起錨」。
樂隊其中兩位女成員吱吱噚，佢哋話好似認得其中一個係教育局嘅官，但唔知叫乜名；至於另一個，即係蘇錦樑，就唔知係邊個局。