政壇每隔一段時間就會傳出全國人大常委范徐麗泰有意選特首嘅消息，尋日立法會表決政改方案，白鴿黨涂謹申發言時突然「爆料」，話前日喺立法會餐廳同一位資深建制派議員同枱食飯，聽到話「范太埋緊班」……呢個消息咁突然，又喺發言中爆出，真係出人意表。不過親建制人士就話，消息九成係流料，莫非范太又畀人擺上枱？
阿涂話中央要解決香港管治危機，必須搵個信得過嘅人做特首「臨時工」，仲話尋日咁啱喺立法會廁所撞到一位司局級高官，個高官亦話呢個消息「北京傳得好行」喎！政界近日傳出煲呔曾以不惜辭職嚟要中央接納白鴿黨區議會方案，政壇呢個時候吹呢個風，唔通內有乾坤？親建制人士就話，事件似乎係有人製造「驚人」新聞，想轉移社會對政改爭拗嘅焦點。
工聯會黃國健講得更白，話范太若要跑馬仔，依家應該拉緊票，但從未有聽聞。范太身邊嘅人話，范太已經回應過，唔再回應囉。咁又係，如果范太次次都回應，真係好唔得閒！