尋日下晝五點左右，突然有三盤精美點心送到立法會二樓，有紅棗糕、馬蹄糕、叉燒同三文治等，全部的的骰骰好骨子，其中燒到皮香肉脆的叉燒粒，據講係以家傳秘方烹調，用豬頸肉煮，有濃濃豆豉醬味，同出面啲叉燒好唔同。

兩粒鐘後，葉劉同助手又捧住八大盤壽司入嚟，今次係美心集團旗下嘅迴轉壽司外賣。葉劉話，知大家辛苦咗兩日，為大家打吓氣。夜晚八點幾，林公公又搵助手送咗幾大包燒味嚟，立法會走廊一帶好似茶餐廳咁，沖淡唔少議會嘅緊張同沉悶。