大輝話：「佢（煲呔曾）話同我哋風雨同舟，但嗰隻舟最後變咗雙人獨木舟，上邊只有佢同民主派，劉江華，你哋民建聯連船尾都摸唔到，我哋獨立議員都只可以喺岸邊做啦啦隊拍吓手。」說罷同坐喺斜對面嘅建仔議員相視苦笑。數開煲呔曾，大輝一於買一斤送四両，佢之前話過煲呔曾敢於搵余若薇辯論係勇者無懼，尋日就改晒口。

「起錨騷嘥錢兼分化社會」

佢話，煲呔曾當日辯論搵錯對象，如果當日搵白鴿主席鐵頭仁嘅話，大家激辯大騷後又取得大共識，結局一定更精彩。平時溫文少動氣嘅大輝用咗三分之一發言時間明諷暗寸煲呔曾，仲連煲呔曾同二十幾名問責團隊嘅起錨騷都唔放過。大輝話，據佢理解，起錨嘅意思等如走佬，唔通煲呔曾有走佬之意？講到咁白，係咪為他人做嫁衣裳呢？

富貴黨嘅方剛亦話，「起錨」係唔理性嘅口號，亦搞到社會唔理性，咁樣落去，經濟受影響，商界人士遲早個個一齊起錨走人。勞聯嘅李鳳英就猛砌起錨騷嘥錢，分化社會，仲語重心長咁嗌煲呔曾「唔好再做呢啲無謂嘢」。議員葉劉淑儀更質疑政府「有事就急Call，夠票就唔睬你，有意見又唔理，真係有事鍾無艷，無事夏迎春」。煲呔曾捱轟，鐵頭仁又被明槍暗箭射到周身傷，佢哋會攬住一齊沉船定各自跳船呢？