呢，壹淫媒自吹自擂，聲稱爛果報讀者人數已「超過主要競爭對手」，升至全港第一喎，唔知嘅畀佢嚇死，知嘅就畀佢笑死。係人都睇到，爛果報一向吹水唔抹嘴，稟神無句真，今次唔使問阿貴，必定又係作大喇。原來呢，爛果報所謂全港第一，居然係將報紙同網站嘅瀏覽數字加埋一起充大頭鬼，你話係咪笑死人吖。如果咁都得，不如認埋世界第一、宇宙第一吖，笨！

正所謂，面係人哋畀，架係自己丟，爛果報閂埋門自我陶醉，本來與人無尤，至弊佢哋恨「第一」恨到發燒，竟公然作大，咁就真係笑死人喇。叮，全港第一唔係靠吹水，而係要有根有據嘅。根據國際市場研究公司Oracle Added Value最新調查，《東方日報》連續三十四年全港銷量第一，讀者人數超過三百四十四萬，同○八年六月相比，升咗百分之十三，讀者人數比爛果報足足多百分之三十四。睇嘢喇，咁先至係貨真價實嘅全港第一吖嘛，淫賤黎，你吹水第一就真。

講起Oracle Added Value，好有來頭㗎，佢係全球四大國際市場研究公司之一，客戶多數係國際知名嘅大集團同大機構，包括滙豐銀行、可口可樂、百事可樂、Ｐ&Ｇ等等跨國企業。所以話，由該公司進行嘅調查，權威性及公信性絕對毋庸置疑，冇花冇假，珍珠都冇咁真。

《東方日報》王者飛躍，再闖高峰，一哥地位實至名歸，而穩佔全港中文報章銷量第三位嘅《太陽報》亦唔失禮㗎。根據同一項調查，《太陽報》讀者人數接近一百三十萬，同○八年六月相比，升幅高達百分之二十八，絕對唔簡單。換句話講，《東方日報》及《太陽報》讀者人數加埋超過四百七十萬，贏爛果報足足九條街。

講開《太陽報》，就算畀人話賣花讚花香，太一叮都要講句，「太陽仔，你係得嘅！」呢份以年輕讀者為主要對象嘅報紙，不時發掘全城哄動嘅爆炸性新聞，愈來愈受到後生仔女追捧，唔止讀者人數與日俱增，廣告收入更加表現出色，有雙位數字嘅升幅，唔到你唔服。

當然，《太陽報》一向求新求變，絕對唔會滿足於現狀。《太陽報》打破傳統，押後出版時間，務求為讀者送上最新、最詳盡嘅消息，事實證明，經過「衝破黎明、再起革命」之後，《太陽報》的確令人耳目一新，無論係城中大事、兩岸消息、國際新聞、娛樂八卦，或者係歐美金融市場最新行情，一網打盡，一覽無遺；尤其係正打得如火如荼嘅世界盃，各場賽事嘅戰況、賽果，甚至球場內外嘅花邊新聞，《太陽報》都為讀者一一送上，呢種優勢，其他報紙又點可以相提並論吖？

俗語有話，兄弟同心，其利斷金。《東方》《太陽》雙劍合璧，所向披靡，宣傳推廣，信心首選，相信尊貴及精明嘅你必定識得選擇！