從建仔新星陳克勤爆咗單「搓our breast」風波後，政壇人士講英文都小心翼翼。日前，建仔舉行中委會會議後，主席「譚Sir」譚耀宗同副主席張國鈞見記者，譚Sir一直做主打，好流暢咁有問有答，但當記者以英文提問時，譚Sir忽然將個波拋畀張國鈞，好似要本身係律師、又係法律碩士嘅張國鈞伸出援手咁，佢就喺一邊點頭附和。唔通譚Sir驚講錯嘢？
事隔一日，立法會議員就政改方案嘅表決展開辯論，兩個議案萬眾矚目，引嚟好多國際傳媒關注，立法會亦多咗一班稀客，譚Sir作為最大建制政黨主席，梗係畀人捉住問立場啦，譚Sir聽到英文Q並冇退避，反而好自然咁回答，佢講英文雖然冇乜抑揚頓挫，但都對答如流，唔似英文唔見得人噃，三、四條問題之後，記者都滿意咁收貨離開。
點解二十四小時後，譚Sir判若兩人呢？唔通佢通宵學英文？可能答案有二，一係譚Sir明知政改表決日有好多外籍記者，事先搵人擬定英文問答，佢就背定標準答案；第二個可能就係前晚嘅記者會，難免要覆述中委會議，為免表達唔好誤事，譚Sir咪暫時搵幫手囉。