煲呔曾發動問責班子落區搞起錨騷，二十幾個問責官員仲要奉旨全天候佩戴起錨襟章。尋日一眾問責官員又再拉隊去立法會撐場，不過呢班「啦啦隊」人人心口有個起錨襟章，唔符合立法會規定公眾席唔可以展示政治標語嘅規定，一眾行會要員、副局政助要除晒襟章至獲准進入公眾席。
政改辯論前一小時，啲官員相繼殺到，襟上戴住大紅大藍嘅局長魚貫進入官員席，行會成員同副局政助就去公眾席，但行會召集人梁振英（CY）、運輸及房屋局副局邱誠武、食物及衞生局副局梁卓偉、教育局副局陳維安等都被要求除章。
煲呔曾起錨騷再觸礁外，副局政助都被發現撐政改有心無力。有人見到財政司司長政助葉根銓喺公眾席全程攞住個文件夾嚟睇，但文件夾卻另有一本書，食物及衞生局政助陳智遠就忙於玩手機，梁卓偉亦不停㩒電腦，仲有人瞌眼瞓添。咁嘅啦啦隊點打氣呀？