暑假將至，唔少市民都策劃外遊大計，香港咁熱，好多人都揀啲天氣涼嘅地方，馬會大董周永健一家三口同亞視前主席張永霖（Linus）夫婦就不約而同計劃去加拿大旅遊，避暑兼充電。周永健打算喺下個馬季開鑼前抽十日時間，同太太胡慕芳及愛兒Justin去北美洲旅遊，一來去探望居於美國同加拿大溫哥華嘅朋友，又可順便周圍去玩番吓。
至於Linus同太太Silvia，原來喺加國有自置物業，所以每年暑假都會去加國避暑，認真識歎。同Silvia傾開，先知道Linus早前為咗亞視風波搞到好唔開心，因為Linus覺得自己作為亞視股東查懋聲嘅好朋友，但又幫唔到手，個心都唔好過。Silvia話Linus離開亞視後個人輕鬆咗，心情都好番啲。