本文重點
立法會尋日上演政改大戰，中環心臟地帶變咗支持同反對陣營交鋒嘅戰場，警方喺立法會一帶採取嚴密戒備，立法會停車場變咗緩衝帶，啲議員唔可以揸車返去，坐車返到去都要嗱嗱聲落車畀架車走。雖然秘書處預備咗車載議員，但啲議員似乎唔多領情。不過，今次特別安排都令到好多尊貴議員搭港鐵返工，體驗吓打工仔嘅艱辛。
葉偉明被粗口問候
立法會秘書處尋日安排咗接駁巴士由金鐘載議員返立法會，時間由上晝九點至十一時半，但成朝只見五名議員坐車，包括白鴿黨嘅涂謹申同甘乃威、建仔嘅陳克勤同陳鑑林，以及衞生服務界嘅李國麟，但佢哋五個都喺唔同時間搭車，結果變咗五次「包車」返議會。
大部分議員就八仙過海咁返議會，白鴿黨嘅李華明搭港鐵返立法會，冇受到任何滋擾，仲話好耐未試過返工時間搭港鐵，原來真係好逼㗎。工聯會葉偉明就由中環站行去立法會，佢經過遮打花園時，畀人用粗口問候，幸好有驚無險。建仔李慧琼就話，佢喺金鐘站落車行去立法會，途經遮打花園，期間仲遇到撐政改支持者，話呢個路線圖幾好吖。工程界何鍾泰朝早八點已經到立法會，佢笑住話，咁早到連啲「80後」示威者都未起身，一定好安全。