尋日下晝政改方案未開始辯論，已有議員動議中止辯論。泛民議員發言時，有啲大講茶餐廳阿嬸、屋邨阿伯唔明白方案，有啲就拖醫學界嘅梁家騮落水，話佢唔夠時間諮詢選民意見。白鴿黨嘅鄭家富喺辯論開始冇耐就發言，佢尋日一早已亮相電台烽煙節目，預報喺立法會發言時會交代係咪退黨，所以佢講嘢時好多人都到實。

長毛大講中共歷史

佢大打感性牌，由十六年前創黨同喺白鴿黨嘅黃金歲月講起，期間好似朝早喺電台咁淚盈於眶，一度哽咽，跟住又扯到睇世界盃好攰，甚至規勸前黨友「大舊」陳偉業小心健康等，議事廳好似變咗佢嘅舞台咁。

離題發言博到曝光率嘅仲有長毛，佢一企起身就大講中共歷史，由幾十年前嘅中共廬山會議講到八十年代初期胡耀邦落台，撐到冇雷公咁遠，結果主席要三番四次質問佢嘅發言同辯論有乜關係，但長毛話之你繼續噴口水。

鼠王芬見泛民係咁拖，忍唔住以其人之道還施彼身，由自己當年讀書講起，跟住攞條繩出嚟話呢條繩既可吊頸，又可打結，亦可解結，似乎想話政改同呢條繩一樣，結果各不相同。話口未完，主席又忍唔住問佢發言同動議辯論有乜關係？佢哋個個咁樣開會，政改辯論首日入唔到正題，一啲都唔奇怪啦！