件事係咁嘅，話說有位游先生，今年六十五歲，以前長駐內地，喺製衣廠打工，○八年被裁員回流返港，同年十二月申請綜援，但係被社署拒絕，理由係佢過去一年大部分時間都唔喺香港。游先生條氣唔順，入稟申請司法覆核，高等法院法官尋日裁定佢勝訴。

判詞話，社署嘅政策將永久居民分成「有離港」同「無離港」兩類，予以不同待遇，違反《基本法》中「法律面前人人平等」及「保障出入境自由」嘅規定。法院下令社署撤銷拒批綜援嘅決定。

叮，咁就大件事咯，事關類似個案成千上萬，社署即刻宣布暫停執行有關規定，睇嚟仲有排煩。

話時話，呢件事本來唔使搞到咁大鑊嘅。冇錯，政策係規定市民申請綜援之前一年唔可以離開香港超過五十六日，但係又規定，喺特殊情況下，社會福利署署長可考慮運用酌情權，接受未符合居港要求人士嘅綜援申請。嗱，好似呢位阿伯咁，份工冇咗，人又老錢又冇，係咪可以酌情照顧吓先？可惜，社署官員鬼死咁涼薄，一於冇得傾，話之你瞓街啦。

講真，話社署官員無情，一啲都冇冤枉佢哋，佢哋審批綜援申請鬼死咁求其，該批嘅唔批，唔該批嘅又批咗。嗱，前幾年有單個案就夠晒騎呢，有位七十八歲獨居長者，年老失業，孑然一身，十幾年嚟一直靠綜援生活，後來因為搬出所住嘅板間房，但冇通知社署，社署人員又懶到出汁，冇調查就停發佢嘅綜援，老人家走投無路，走去打劫便利店，但又叫職員報警，擺明係博拉。佢話，坐監起碼有食有住，唔使擔心一宿兩餐。咁嘅說話，邊個聽咗唔心噏！社署班官僚直情係逼良為匪。

綜援本來係用嚟幫助有需要嘅市民，但係家陣變晒質，貧窮市民被拒諸門外，反而有啲根本冇資格嘅人就成功申領。最離譜嘅例子莫過於前高院法官李栢儉，兩公婆一個係退休法官，一個係退休大狀，有幾十萬藍籌股揸手，喺英國仲有物業出租，但係佢哋扮窮呃綜援，社署嗰班懵官居然照批可也，畀佢哋大拿拿呃走十幾萬公帑。

講番游先生嗰單案件，法官直斥現行法例違憲。冇錯，法例係有漏洞，但更大嘅問題係人，最好嘅法例落到呢班官僚手上都會變成惡法。所以，過時嘅政策要修訂，涼薄嘅官僚更要修理。叮！